Bu ilin yanvar-mart aylarında Azərbaycana dünyanın 157 ölkəsindən 610,8 min və ya 2018-ci ilin yanvar-mart ayları ilə müqayisədə 2,9% az əcnəbi və vətəndaşlığı olmayan şəxs gəlib.
Bu barədə Dövlət Sərhəd Xidməti məlumat verir.
Məlumata görə, gələnlərin 28%-i Gürcüstan, 27,4%-i Rusiya, 11,3%-i Türkiyə, 9,2%-i İran, 3,5%-i Birləşmiş Ərəb Əmirlikləri (BƏƏ), 1,8%-i Ukrayna, 1,7%-i Hindistan, 1,4%-i İraq, 15,6%-i digər ölkələrin vətəndaşları, 0,1%-i isə vətəndaşlığı olmayan şəxslər olub. Gələnlərin 70,1%-ni kişilər, 29,9%-ni isə qadınlar təşkil edib.
Ötən ilin eyni dövrü ilə müqayisədə ölkəmizə gələnlərin sayında daha çox azalma Qətər (48,5%), İran (43,4%), İsrail (41,7%), BƏƏ (28,1%) və İraq (24,8%) vətəndaşları arasında qeydə alınıb.
Bununla yanaşı, Misirdən gələnlərin sayı 2,3 dəfə, Hindistandan - 1,8 dəfə, Səudiyyə Ərəbistanından - 1,8 dəfə, Türkmənistandan - 1,6 dəfə, Pakistandan - 1,5 dəfə, Çindən - 46,1%, Yaponiyadan - 32,5%, Gürcüstandan - 22,9%, Omandan - 17,4% artıb.
2019-cu ilin yanvar-mart aylarında Avropa İttifaqına üzv ölkələrdən gələnlərin sayı 2,8% artaraq 19,1 min nəfər, Körfəz ölkələrindən gələnlərin sayı 33,1% azalaraq 106,8 min nəfər, MDB ölkələrindən gələnlərin sayı 1,1% azalaraq 202,3 min nəfər olub.
Ölkəmizə gələn əcnəbilər və vətəndaşlığı olmayan şəxslərin 64%-i dəmir yolu və avtomobil, 35,2%-i hava, 0,8%-i isə su nəqliyyatından istifadə edib.
2019-cu ilin yanvar-mart aylarında xarici ölkələrə gedən Azərbaycan vətəndaşlarının sayı əvvəlki ilin müvafiq dövrü ilə müqayisədə 28,9% artaraq 1 215,7 min nəfər olub. Gedənlərin 66,5%-ni kişilər, 33,5%-ni qadınlar təşkil edib.
Bu dövrdə İrana gedən Azərbaycan vətəndaşlarının sayı 84,2%, Gürcüstana gedənlərin sayı 12,7%, Rusiyaya gedənlərin sayı 7,4%, Türkiyəyə gedənlərin sayı isə 3% artıb.
Cari ilin yanvar-mart aylarında xarici ölkələrə səfər etmiş Azərbaycan vətəndaşlarının 83,6%-i dəmir yolu və avtomobil, 15,6%-i hava, 0,8%-i isə su nəqliyyatından istifadə edib.
Toplum TV Azərbaycanın müstəqil xəbər platformasıdır. Ölkədə və bölgədə baş verən hadisələri dəqiq və qərəzsiz şəkildə izləyicilərimizə çatdırırıq.
Toplum TV hər gün siyasət, iqtisadiyyat, sosial, kriminal, gender mövzularında reportajlar və xəbər proqramları, tolk-şou və müsahibələri diqqətinizə təqdim edir.
Ən doğru xəbərləri izləmək üçün Toplum TV-yə abunə olun.